Теләче районында «Террорга каршы бергә» акциясен уздырдылар

Теләче районында террорчылыкка каршы куркынычсызлык ункөнлеге кысаларында «Террорга каршы бергә» акциясе узды. Чараны «Чишмә» халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлекчәсе белгече Әлфинә Фәхриева үткәрде.

Акциядә балалар һәм аларның ата-аналары катнашты. Очрашу барышында теракт куркынычы булганда үз-үзеңне тотуның база кагыйдәләре, деструктив бергәлекләр йогынтысыннан саклану ысуллары һәм ярдәм сорап мөрәҗәгать итү алгоритмнары каралды.

Аерым игътибар гаиләдә аралашу мәсьәләләренә бирелде. Белгеч ата-аналарга башлангыч мәктәп яшендәге балалар белән куркынычсызлык темалары турында аңлаешлы формада фикер алышу буенча киңәшләр бирде.