Түбән Кама районында өлкән яшьтәге кешеләрнең яшәү шартларын тикшерәләр
Бу атнада Түбән Кама районының «Шәфкать» халыкка социаль хезмәт күрсәтү комплекслы үзәгенең өйдә социаль хезмәт күрсәтү бүлеге белгечләре авыл җирлекләрендә булдылар. 80 яшьтән өлкәнрәк ялгыз гражданнар яшәгән 40 йорт тикшерелде.
Визитлар йомгаклары буенча торак-көнкүреш шартларын тикшерү актлары төзелде. Үзәк хезмәткәрләре халыкка социаль хезмәтләр күрсәтү тәртибе турында киңәш бирделәр. Шулай ук янгын куркынычсызлыгы, мошенниклыктан саклау һәм ашыгыч хезмәтләр элемтәләре буенча мәгълүмати материаллар таратылды.
Мондый рейдларның төп максаты – өлкән яшь яки сәламәтлек торышы аркасында тормыш ихтыяҗларын мөстәкыйль тәэмин итә алмаган гражданнарны ачыклау. Эш «Гаилә» милли проекты кысаларында алып барыла. Киләчәктә районның башка торак пунктларында да шундый ук чаралар уздыру планлаштырыла.