Хисап атнасында предприятиеләрдә 10 хезмәткәр зыян күргән

Татарстан Республикасы Хезмәт, халыкны эш белән тәэмин итү һәм социаль яклау министрлыгы җитештерүдәге бәхетсезлек очраклары нәтиҗәсендә зыян күргән хезмәткәрләр хакындагы мәгълүматларны публикацияләүне дәвам итә. Татарстан Республикасының Дәүләт хезмәт инспекциясе мәгълүматына  караганда, 12 нче декабрьдән 19 нчы декабрьгә чаклы 4 үлем белән тәмамланган һәм 6 авыр  бәхетсезлек очрагы теркәлгән.
Беренче үлем очрагы 16 декабрьдә "КАМАЗ" Яр Чаллы ААҖ тимер заводында булган. Эш урынында чакта 53 яшьлек хезмәткәр инфаркттан үлеп китә.
Шул ук көнне "Булак Инвестмент" ҖЧҖдә дворник та йөрәк өянәгеннән вафат була.
17 декабрьдә  өченче үлем очрагы теркәлгән. "Блеск-Сервис"та эшләүче дворник, үзен начар хис итеп, медицина хезмәткәренә мөрәҗәгать иткән чакта үлеп китә.
 Бу атна өчен соңгы үлем очрагы Азнакайда урнашкан "Спецтранспорт" ИКдә теркәлә. Биредә дә сәламәтлеге начараеп бер хезмәткәр вафат була.
Хисап атнасында шулай ук 6 авыр бәхетсезлек очрагы теркәлгән.  12 декабрьдә А.Н.Туполев  исемендәге университетның 27 яшьлек хезмәткәре баскычта ут көйләү эшләрен башкарганда уң кул чугын пешерә.
"Биектау коммуналь челтәре" ҖЧҖдә  Дөбъяз авылындагы магистраль сууткәргечтә су бәреп чыгуны туктаткан чакта котлован ишелә һәм эшченең сәламәтлегенә  зыян килә.
Өченче бәхетсезлек очрагы 12 декабрьдә Әлмәт районының "Арслан" ҖЧҖдә була. Юл-транспорт һәлакәте нәтиҗәсендә 58 яшьлек хезмәткәрнең баш мие тетри, күкрәк читлеге имгәнә.
Чираттагы очрак шулай ук Әлмәт районында була. "Стрела-М" җәмгыятендә эшләүче машина йөртүче Азнакай-Яңа Чишмә юлында юл-транспорт һәлакәтенә очрап, җәрәхәтләр ала.
Бишенче очрак исә 17се көнне Казандагы "Кон" җәмгыятендә була. Биредә эшләүче хезмәткәр 20нче каттан егылып төшә.
Соңгы очрак исә шул ук көнне "Түбән Кама механик заводы"нда теркәлә. Җайланманы төзекләндергән чакта эшче җәрәхәтләнә.