«Апрель» үзәге балалары һәм белгечләре «Зәңгәр белән кабыз» акциясендә катнашты
2 апрельдә Казандагы «Апрель» мөмкинлекләре чикләнгән балалар һәм яшүсмерләр өчен тернәкләндерү үзәге хезмәткәрләре һәм балалары Бөтендөнья аутизм проблемасы турында мәгълүмат тарату көненә кушылдылар һәм «Зәңгәр белән кабыз» халыкара акциясендә катнаштылар. Аутистик спектр бозылулары булган балалар һәм аларның гаиләләре белән теләктәшлек йөзеннән чарада катнашучылар зәңгәр шарлар әйләнәсендә зәңгәр киемдә фотога төштеләр.
Зәңгәр төс инде күптән бу халыкара инициативаның символы булып тора. Ел саен акция бөтен дөнья буйлап кешеләрне берләштерә, җәмгыятькә аутизмлы кешеләрне аңлау, кабул итү һәм аларга ярдәм итүнең мөһимлеген искә төшерә. «Апрель» үзәгендә бу акциядә катнашу елдан-ел саклана торган күркәм традициягә әверелде.
Мондый чаралар ярдәм билгесе буларак кына түгел, ә аутизм темасына игътибар җәлеп итү, мондый кешеләрнең һәм аларның якыннарының ихтыяҗлары турында сөйләү, шулай ук инклюзив һәм яхшы мохит булдыру кирәклеген ассызыклау мөмкинлеге буларак та аерым әһәмияткә ия.
«Апрель» тернәкләндерү үзәгендә һәр бала үзен кабул ителгән, кыйммәтле һәм кирәкле итеп тоя торган киңлек булдырырга омтылалар.