«Астра» үзәгендә тәрбияләнүчеләр Сирәк коллекцияләр галереясендә булдылар
Бүген Алабуга районының «Астра» сәламәтлек мөмкинлекләре чикләнгән балалар һәм яшүсмерләр өчен тернәкләндерү үзәгендә тәрбияләнүчеләр Сирәк коллекцияләр галереясендә булдылар. Бу махсус мәйданчык, анда шәхси җыелмалардан, мавыгучы кешеләрнең коллекцияләреннән гадәти булмаган һәм кыйммәтле әйберләрне күрергә мөмкин.
Балаларга Россия һәм Европа заводларында чуеннан коеп ясалган әйберләренең уникаль коллекциясе тәкъдим ителде. Экспонатлар Екатеринбургтан Михаил Сачевның шәхси коллекциясенә карый.
Экспозиция белән танышу барышында балалар кешеләрнең төрле предметлар җыюларын һәм өйрәнүләрен белделәр. Һәр экспонат үз тарихын саклый һәм үткәнгә, мәдәнияткә һәм сәнгатькә кызыксыну уята. Балаларга экскурсия вакытында тәкъдим ителгән иҗади һәм логик биремнәр аеруча ошады.
Тәрбияләнүчеләр өчен бу сәфәр яңа белемнәр чыганагы, социальләшүнең мөһим этабы булды.