Түбән Камада инвалид балаларны тернәкләндерү буенча семинар узды
Шушы көннәрдә Түбән Кама районының «Шәфкать» халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлекчәсендә «Инвалид балалар белән эшләүдә тернәкләндерү үткәрүнең нәтиҗәле коралы буларак уен алымы. Сәламәтлек мөмкинлекләре чикләнгән кешеләр өчен альтернатив һәм өстәмә аралашу чаралары» темасына семинар узды. Чара үзенчәлекле балалар белән эшләүче учреждениеләр белгечләре, шулай ук ата-аналар өчен оештырылды.
Очрашуны ачып, социаль эш буенча белгеч Ирина Кожевникова катнашучыларны сәламләде һәм семинар Авыр тормыш хәлендә калган балаларга ярдәм фонды гранты акчасына гамәлгә ашырыла торган «Өй консультанты» проектын гамәлгә ашыру нәтиҗәсендә мөмкин булды, дип сөйләде. Ирина Александровна шулай ук проектның яңа сервислары эшләтеп җибәрелүе һәм хәзерге вакытта кирәкле җиһазлар сатып алынуы турында хәбәр итте, шул исәптән «Исток-аудио» компанияләр төркеме белән берлектә.
«Исток-аудио» белгечләре урта һәм мәктәпкәчә белем бирү өлкәсендәге хезмәттәшләренә, шулай ук кызыксынган ата-аналарга сәламәтлек мөмкинлекләре чикләнгән балалар өчен җайлаштырылган уенчыклар һәм җыелмалар тәкъдим иттеләр.
Семинар нәтиҗәле үтте: катнашучыларның барысы да сәламәтлек мөмкинлекләре чикләнгән балаларны тернәкләндерү һәм укытуны нәтиҗәлерәк һәм кызыклырак итәргә ярдәм итәчәк яңа заманча уенчыклар һәм өстәмә аралашу чаралары белән танышты.