«Кайгырту» социаль хезмәт күрсәтү үзәгендә беренче ярдәм күрсәтү буенча практик дәрес узды
Мамадыш районындагы «Кайгырту» халыкка социаль хезмәт күрсәтү комплекслы үзәгенең социаль-тернәкләндерү бүлегендә укулар узды. Беренче ярдәм күрсәтү нигезләре буенча дәресне «Беренчеләр хәрәкәте» активистлары – 3 нче мәктәп укучылары оештырды.
Очрашу тормыш өчен мөһим күнекмәләр алырга теләгән 30лап катнашучыны берләштерде. Укыту программасы ашыгыч хәлләрдә төп гамәлләр алгоритмнарын үз эченә алды: аңын югалткан кешегә ярдәм, кома хәлендәге кешене тапканда гамәлләр тәртибе, төрле авырлыктагы җәрәхәтләр вакытында беренче ярдәм. Өлкәннәр алган белемнәрен практикада ныгытып, зур активлык күрсәттеләр.
Мондый инициативаларның бәяләп бетергесез социаль әһәмияте бар: беренче ярдәм күрсәтү мәсьәләләрендә халыкның грамоталылыгын арттыру җәмгыятьнең иминлегенә турыдан-туры йогынты ясый һәм куркыныч хәлләрдә кешеләрне коткару мөмкинлекләрен арттыра.