«Астра» үзәгендә тәрбияләнүчеләр Россиядә Махсус операцияләр көчләре турында белделәр

2026 елның 3 марты, сишәмбе

Алабуга районындагы «Астра» мөмкинлекләре чикләнгән балалар һәм яшүсмерләр өчен тернәкләндерү үзәгендә Россиядә Махсус операцияләр көчләре көне уңаеннан интеграцияләнгән чара узды.

Дәрес истәлекле дата һәм Махсус операцияләр көчләре сафында илнең төрле халыклары вәкилләре хезмәт итүе турындагы әңгәмәдән башланды. Алга таба тәрбияләнүчеләр сугышчылар турында кыска метражлы фильм карадылар.

Дәвалау физкультурасы буенча инструкторлар белән берлектә эстафета оештырылды, анда балалар төгәллек, чыдамлык күрсәттеләр.

Чара ахырында балалар хыялларны, иҗатны һәм балачак хатирәләрен символлаштырган кәгазь самолетлар ясадылар.