«Кама таңнары» приютында тәрбияләнүчеләр гипс белән эшләргә өйрәнәләр

2026 елның 6 феврале, җомга

Менделеевск районының «Кама таңнары» балалар һәм яшүсмерләр өчен социаль приютында «Чүлмәкчелек остаханәсе» проектын гамәлгә ашыру кысаларында гипс сыннар ясау буенча мавыктыргыч мастер-класс узды.

Педагог гипсның табигате, аның үзлекләре һәм сәнгать иҗатында кулланылышы турында сөйләде. Балалар гипс фигураларның интерьер бизәге һәм хәтта уникаль бүләкләр булдыру өчен нигез була алуы турында кызыксынып тыңладылар. Теория буенча фикер алышканнан соң, практикага керештеләр. Һәркемгә материаллар җыелмасы бирелде. Процесс кызыклы һәм күңелле булып чыкты.

Мастер-класс ахырында балалар үзләренең иҗатларын горурлык белән күрсәттеләр. Бу чара яңалыкка өйрәнергә мөмкинлек биреп кенә калмыйча, балаларның үз көчләренә ышанычын ныгытты.