«Өмет чаткысы» үзәгендә ата-аналарга һәм балаларга иҗади мастер-класс тәкъдим иттеләр
Арча районының «Өмет чаткысы» мөмкинлекләре чикләнгән балалар һәм яшүсмерләр өчен тернәкләндерү үзәгендә гадәти булмаган чара узды. Тәрбияләнүчеләрнең берсенең әнисе Айсылу Әхмәтова ата-аналар һәм өлкән балалар өчен ротангтан кәрзин үрү буенча мастер-класс үткәрде. Сабырлык, җитезлек һәм игътибар таләп итә торган бу сәнгать тернәкләнү процессы өчен бик файдалы, чөнки ул тырышлыкны, сенсориканы, кул моторикасын үстерә һәм гүзәллек хисе тәрбияли.
Айсылу Әхмәтова җитәкчелегендә әниләр, үз проблемаларын онытып, иҗатка чумдылар. Күпләр өчен бу беренче тәҗрибә булды.
Уртак иҗат үзара аңлашуга, көндәлек киеренкелекне бетерүгә күпер булды. Уртак өстәл артында ата-аналар аралаштылар, көлештеләр һәм бер-берсенә булыштылар. Тернәкләндерү – ул процедуралар һәм күнегүләр генә түгел, ә иҗат һәм аралашу шатлыгы да.