Көндезге тору бүлегендәге яшьләр мөстәкыйльлеккә өйрәнәләр
Идел буе федераль округының «Менталь сәламәтлек» иҗтимагый проектын гамәлгә ашыру кысаларында Яр Чаллы шәһәренең «Ышаныч» халыкка социаль хезмәт күрсәтү комплекслы үзәге карамагындагылар өчен социаль-көнкүреш адаптациясе буенча мөһим практик дәрес – даруханәгә бару үткәрелде.
Чараның максаты – социаль хезмәтләр алучыларны кирәкле дарулар, витаминнар, санитария һәм гигиена предметларын мөстәкыйль сатып алырга өйрәтү, шулай ук җәмәгать урыннарында мөстәкыйль үз-үзеңне тоту күнекмәләрен үстерү.
Практик өлеш башланыр алдыннан социаль хезмәт алучыларга даруханәгә баруга ничек дөрес әзерләнергә кирәклеге турында җентекләп аңлаттылар. Чара барышында тәрбияләнүчеләр шәһәрнең якындагы даруханәләренең урнашу урынын, шулай ук эш режимын өйрәнделәр. Даруханәгә бару үзе рольле уеннар һәм практик дәресләр формасында узды.
Мондый тәҗрибә социаль хезмәтләр алучыларның мөстәкыйльлеген үстерүгә ярдәм итә. Практик дәресләр аша социаль күнекмәләргә өйрәтү җәмәгать урыннарында борчылу дәрәҗәсен киметергә, яшьләрнең тормыш сыйфатын яхшыртырга ярдәм итә.