Татарстанда психотравматик вакыйгалар кичергән балаларга ярдәм итәләр
Татарстан Республикасында «2024–2025 елларда балалар иминлеген тәэмин итүнең төбәк системасын үстерү буенча чаралар комплексы» проектын гамәлгә ашыруга йомгак ясалды. Аның максаты – рәхимсез мөгамәләдән яки җинаятьләрдән зыян күргән балаларга, шулай ук психологик травма кичерүче балаларга ярдәм итү.
Бу вакыт эчендә заманча социаль сервисларның тулы бер челтәре булдырылды, алар инде йөзләгән кешегә – балаларга һәм өлкәннәргә ярдәм итте. Эш Казан һәм Яр Чаллы шәһәрләрен дә кертеп, 20 муниципалитетта алып барылды. Максатчан төркемгә психотравматик вакыйгалар (мәрхәмәтсез мөгамәлә, үз-үзеңә кул салу омтылышы, якыннарын югалту, сугышчан хәрәкәтләр зонасында яшәү) кичергән балалы гаиләләр; башка балаларга карата мәрхәмәтсезлек күрсәткән балигъ булмаган балалары булган гаиләләр; МХОда катнашучыларның гаиләләре, кризис хәлендә калган балигъ булмаган аналар һәм балалы хатын-кызлар керде.
Проектны гамәлгә ашыру барышында 20 социаль хезмәт күрсәтү комплекслы үзәге һәм 7 социаль приют базасында 33 уен терапиясе кабинеты, конфликтлы ситуацияләрне җиңеп чыгу өчен 7 татулашу кабинеты ачылды, катлаулы матди хәлдә калган яшь ата-аналар өчен 4 социаль прокат пункты эшләтеп җибәрелде. Моннан тыш, 20дән артык учреждение заманча сенсор-релаксацион һәм психологик-педагогик җиһазлар белән җиһазландырылган.
Барлыгы 441 бала һәм 495 ата-ана ярдәм алды.
«2024–2025 елларда балаларның иминлеген тәэмин итүнең төбәк системасын үстерү буенча чаралар комплексы» проектын гамәлгә ашыру «Гаилә» илкүләм проектының максатларына һәм бурычларына туры килә.