«Хыял» приютында тәрбияләнүчеләр педагогик хезмәт ветераны янына бардылар

2025 елның 12 декабре, җомга

Аксубай районында «Хыял» балалар һәм яшүсмерләр социаль приютында тәрбияләнүчеләр «Ярдәм кулы суз» акциясендә катнаштылар. Балалар педагогик хезмәт ветераны Николай Янилкин янына бардылар.

Приютта тәрбияләнүчеләр алдан әзерләнеп, ветеранга үткән туган көне белән ихлас котлау бүләк иттеләр. Алар күңелне нечкәртерлек шигырьләр укыдылар.

Николай Янилкин кунакларны җылы кабул итте һәм аларга рәхмәт белдерде. Ул үзенең һөнәри юлы, балачагы, тормыш дәресләре һәм узган гасырның кызыклы мизгелләре турында мавыктыргыч итеп сөйләде.

Мондый очрашулар яшьләргә өлкәннәргә хөрмәтнең әһәмиятен яхшырак аңларга ярдәм итә.