Казанда балигъ булмаганнар өчен акция уздырдылар
Үсеп килүче буынның иминлеге мөһимлеген искә төшерергә тиешле Бөтендөнья балалар көне кысаларында Казанның Авиатөзелеш районындагы гаиләгә һәм балаларга социаль ярдәм бүлекчәсе белгечләре «Чыгу юлы һәрвакыт бар!» акциясе уздырды.
Акциянең төп максаты – эмоциональ иминлекне, шәхеснең психологик гармониясен саклауда, үз-үзеңне куркынычсыз тоту күнекмәләрен формалаштыруда һәм авырлыклар һәм стресс белән көрәшә белүдә ярдәм итү.
Социаль хезмәтләр алучы балигъ булмаганнар белән үз хисләреңне аңлау һәм контрольдә тоту, дөньяга уңай караш саклау һәм стресслы ситуацияләргә адекват җавап бирү кирәклеге турында индивидуаль һәм төркемле әңгәмәләр уздырылды. Балаларга ярдәм итүнең мөһим инструменты – балалар ышаныч телефоны турында искә төшерделәр.
Белгечләр әйтүенчә, мондый акцияләр үткәрү балаларда куркынычсызлык һәм якланганлык хисе, чыгу юлы һәрвакыт булуына ышаныч формалаштырырга ярдәм итә.