Студентларга яшь гаиләләргә ярдәм чаралары турында сөйләделәр
Татарстан Республикасы Хезмәт, халыкны эш белән тәэмин итү һәм социаль яклау министры урынбасары Наталья Бутаева Казан федераль университетында студентлар гаиләләренә һәм яшь хезмәткәрләргә социаль һәм матди ярдәм чараларына багышланган очрашуда катнашты.
Наталья Бутаева Татарстанда балалы гаиләләргә ярдәм итү программалары турында сөйләде. Республика рәисе Рөстәм Миңнеханов кушуы буенча эшләнгән яңа демографик инициативаларга аерым игътибар бирелде. Алар арасында – йөклелек буенча учетка баскан укучыларга 100 мең сум күләмендә бер тапкыр бирелә торган түләү, аз керемле гаиләләр өчен балалар өчен кирәк-яракларны прокатка бирү пунктлары ачу һәм социаль няня хезмәтен кертү. Бу яңалыклар укуны яки карьераны балалар тәрбияләү белән бергә алып бару өчен уңай шартлар тудыруга юнәлдерелгән.
