«Аеклык ноктасы» социаль проекты бәйлелек белән авыручы кешеләргә нормаль тормышка кайтырга ярдәм итә
Татарстан Республикасында 2015 елдан ата-аналары хәмергә бәйлелектән интегүче гаиләләргә ярдәм итүгә юнәлдерелгән «Аеклык ноктасы» социаль проекты эшли. Бүгенге көндә проектта 212 гаиләдән 225 кеше катнаша. Бу хакта бүген матбугат конференциясе кысаларында ТР хезмәт, халыкны эш белән тәэмин итү һәм социаль яклау министры урынбасары Юлия Абдреева хәбәр итте.
Комплекслы якын килү исерткеч эчемлекләрдән дәвалауны гына түгел, эшкә урнашуны, социаль түләүләрне рәсмиләштерүне, торак-коммуналь мәсьәләләрне хәл итүне һәм ата-ана мөнәсәбәтләрен торгызуны да үз эченә ала. Министр урынбасары сүзләренчә, эшкә мохтаҗ 70 кешенең 66 эшкә урнаштырылган, ә дүртесе яңадан әзерлек курслары уза. Шулай ук коммуналь бурычларны реструктуризацияләү, балаларны мәгариф учреждениеләренә урнаштыру һәм аларның җәйге ялын оештыру буенча да эш алып барыла. Психологлар белән эшләү аша балалар һәм ата-аналар мөнәсәбәтләрен торгызуга аерым игътибар бирелә.
Юлия Абдреева сүзләренчә, проектның аеруча зур казанышы – элек гаиләләреннән алынган һәм приютка урнаштырылган 70 баланың 49 әти-әниләре янына кайтару. Тагын 26 балигъ булмаган бала, белгечләр фаразлавынча, ел ахырына кадәр гаиләләренә кайтачак.
Беренче тапкыр проектка ата-ана хокукларыннан мәхрүм ителгән яки чикләнгән 16 кеше керде, алар дәваланганнан соң үз хокукларын торгызырга һәм балаларын учреждениеләрдән кайтарырга ниятли.
Проектның нәтиҗәлелеге югары булып кала – катнашучыларның 80 % ныклы ремиссиягә ирешә һәм нормаль тормышка кайта. Проект тәмамланганнан соң гаиләләр балигъ булмаганнар эшләре буенча муниципаль комиссияләрнең социаль патронажында торалар, бу мөмкин булган өзеклекләрне булдырмаска һәм гаиләләрдә тотрыклылыкны сакларга ярдәм итә.
Фото авторы: Солтан Исхаков / «Татар-информ» МА