Арчаның тернәкләндерү үзәгендә экологик тәрбия дәресе узды

2025 елның 28 августы, пәнҗешәмбе

Арча районының «Өмет чаткысы» мөмкинлекләре чикләнгән балалар һәм яшүсмерләр өчен тернәкләндерү үзәгендә социаль педагог Нурания Сираҗиева «Без барыбыз да планетабыз өчен җаваплы» дигән темага ачык дәрес үткәрде.

Дәрескә Арча шәһәренең экология үзәгеннән кунаклар чакырылган иде. Социаль педагог балаларга планетага ярдәм итү өчен нәрсә эшләргә кирәклеге турында сөйләде. «Ашыт» табигать тыюлыгы белгече Гөлнара Габдрахманова балаларны экологик проблема белән таныштырды. Сораулар уен технологияләре ярдәмендә хәл ителде, бу балаларда зур кызыксыну уятты.

Социаль педагог сүзләренчә, мондый чаралар балаларга экологик тәрбия бирүгә ярдәм итә, табигатькә мәхәббәт формалаштыра.