«Гаилә» илкүләм проекты: өлкән буын турында кайгыртып

2025 елның 16 апреле, чәршәмбе

Буа районында «Гаилә» илкүләм проектының «Өлкән буын» проектын гамәлгә ашыру кысаларында авыл җирендә яшәүче 65 яшьтән өлкәнрәк гражданнарны район үзәк хастаханәсенә илтү дәвам итә. Вакытында диспансерлаштыру узу сәламәтлек проблемаларын вакытында ачыкларга һәм дәвалауны башларга ярдәм итә. Бу эшнең нәтиҗәсе – өлкән яшьтәге гражданнарның тормыш сыйфатын күтәрү һәм аларның актив озак яшәве өчен шартлар тудыру.

Чаралар «Гармония» халыкка социаль хезмәт күрсәтү комплекслы үзәге автотранспортында бушлай башкарыла. 2025 елда Буа районы торак пунктларыннан барлыгы 1 100 өлкән яшьтәге гражданны китерү планлаштырылган. Беренче кварталда бу хезмәттән районның 309 өлкән кешесе файдаланган инде.