«Гармония» үзәге карамагындагы балалар волонтерлар белән очрашты
Ютазы районының Урыссу шәһәр тибындагы бистәсендә урнашкан гуманитар ярдәм җыю үзәгендә «Гармония» халыкка социаль хезмәт күрсәтү комплекслы үзәге карамагындагыларның махсус хәрби операциядә катнашучыларга ярдәм итүче «көмеш» волонтерлар белән очрашуы булды. Очрашуда шулай ук Россия Әфганстан ветераннары советының Баулы шәһәре һәм Баулы районы буенча вәкиле Ринат Нуриев һәм Ютазы районы Ветераннар советы рәисе Гүзәл Латыйпова катнашты.
Ринат Нуриев балаларга Донецк һәм Луганск республикалары территориясенә сәфәрләре һәм гуманитар йөкнең сугышчыларга бүлекчәләргә һәм хастаханәгә озатылуы турында сөйләде.
Активистлар, волонтерлар һәм Ютазы районының һәр кешесе даими нигездә гуманитар ярдәм җыялар. Социаль хезмәтләр алучылар маскировка челтәрләре ясый, солдатларга хатлар яза.