Татарстан Республикасында балалар иминлеге системасын үстерү
2024 елда Татарстан Республикасында Авыр тормыш хәлендә калган балаларга ярдәм фонды ярдәмендә Балалар иминлеген тәэмин итүнең төбәк системасын үстерү буенча чаралар комплексын гамәлгә ашыру башланды. Чаралар комплексы 20 муниципаль район һәм шәһәрне үз эченә ала, шул исәптән 20 халыкка социаль хезмәт күрсәтү комплекслы үзәге һәм 7 балалар һәм яшүсмерләр өчен социаль приют катнашуын.
Региональ чаралар комплексының төп максаты – рәхимсез мөгамәләдән һәм җинаятьчел һөҗүмнәрдән зыян күргән балаларга, шулай ук катлаулы тормыш хәлләрендә калганнарга ярдәм сыйфатын яхшырту. Моның өчен 15 хезмәткәр Пермь краенда балигъ булмаган җинаять корбаннарына ярдәм күрсәтү буенча укулар узды.
Төп чара – балалы гаиләләр өчен социаль сервислар булдыру. Әлеге проект кысаларында Әгерҗе, Азнакай, Бөгелмә, Биектау, Түбән Кама муниципаль районнарында, шулай ук Казанда һәм Яр Чаллыда 7 комплекслы үзәктә татулашу кабинетлары ачылды. Бу кабинетлар өчен кирәкле җиһазлар һәм инструментарийлар сатып алынды, бу процесста катнашучыларның барысына да уңайлы шартлар тудырырга мөмкинлек бирде.
Шулай ук халыкка социаль хезмәт күрсәтү комплекслы үзәкләренең 20 гаиләгә һәм балаларга ярдәм бүлекчәсе һәм 7 балалар һәм яшүсмерләр өчен социаль приют базасында психологик диагностика һәм коррекция өчен арт-терапевтик җайланмалар кулланып, уен терапиясе кабинетлары эшчәнлеге оештырылган. Социаль приютларда балалар һәм яшүсмерләр өчен «Травли NЕT» антибуллинг программалары кертелгән.
2025 елга Лаеш, Әлмәт, Лениногорск муниципаль районнарында, Яр Чаллы шәһәрендә социаль прокат кабинетларын җиһазлау планлаштырылган. Прокатка кечкенә яшьтәге балалы гаиләләр өчен беренчел кирәкле әйберләр тәкъдим ителәчәк.
Барлык чаралар гаиләләрнең тормыш сыйфатын яхшыртуга һәм психоэмоциональ проблемалар кичерүче балаларга квалификацияле ярдәм күрсәтүгә юнәлдерелгән.