«Шатлык» үзәгендә инклюзив остаханә эше дәвам итә
«Типография» инклюзив остаханәсе» программасын гамәлгә ашыру кысаларындагы чираттагы дәрестә Зәй районы «Шатлык» социаль хезмәт күрсәтү комплекслы үзәгенең көндезге тору бүлегендә тәрбияләнүчеләр стена һәм кесә календарьларын әзерләүнең мавыктыргыч процессына чумдылар.
Барысы да идеяләр турында фикер алышудан башланды. Календарьларның төп герое 2025 ел символы – елан булачак, дип карар кылынды. Тәҗрибәле остазлар җитәкчелегендә, текст һәм график редакторларны кулланып, график дизайн нигезләрен үзләштерделәр. Макет өстендә эш тәмамлангач, басмага вакыт җитте.
Барлык календарьлар да басылгач, аларны резак ярдәмендә кисәргә генә кала иде. Эшнең бу өлеше дә кызыклы булып чыкты. Ахыргы продукт матур гына түгел, сыйфатлы да булып чыкты.
Һәр катнашучы дәрестән үзенең уникаль кесә календаре белән китте, ул аларның хезмәте һәм фантазиясе нәтиҗәсе булды.