Арчада кечкенә китап ясау буенча мастер-класс үткәрелде

Бүген инвалидлар декадасы кысаларында Бөтенроссия сукырлар җәмгыятенең җирле оешмасы белән берлектә Арча районындагы «Шәфкать үзәге» халыкка социаль хезмәт күрсәтү үзәгенең көндезге тору бүлегендә кечкенә китап ясау буенча мастер-класс узды. Дәресне күрү сәләте буенча инвалид Гүзәл Мурысина үткәрде.

Кечкенә китап ясау – бик мавыктыргыч шөгыль. Бу күзаллау, фикерләү, вак моторика үсешенә ярдәм итә, тырышлык формалаштыра.

Балалар бик теләп үзләренең китап миниатюраларын ясадылар. Һәркем файдалы иҗат дәресеннән бик күп күңелле тәэсирләр алды.