Алабуга интернат-йортында яшәүчеләр кошлар турында кайгыртып бәйрәмгә кушылды
Песнәк көне – 2000 еллар башында Россия кошларны саклау берлеге инициативасы белән булдырылган экологик бәйрәм. Ул ел саен 12 ноябрьдә билгеләп үтелә.
Алабуга өлкәннәр һәм инвалидлар интернат-йортында яшәүчеләр дә бу бәйрәмгә кушылды. Алар песнәк ашамлыклары әзерләделәр: чи көнбагыш, тары, солы, бодай, арпа. Боларның барысын да Александровский паркында эленгән җимлекләргә тутырдылар. Моннан тыш, кайбер яшәүчеләрнең тәрәзә артында үз җимлекләре бар, һәм анда кош ашханәсе ел дәвамында эшли. Анда төрле кошлар очып килә.
Канатлы дусларны ашатып һәм күзәтеп, интернат-йортта яшәүчеләр үз җирләрендәге кошларның төрле төрләре, аларның тышкы кыяфәтенең, үз-үзләрен тотышының үзенчәлекләре турында беләләр, елның салкын вакытында кошлар өчен уңайлы мохит тудыралар.