Казанның социаль хезмәт күрсәтү үзәгендә «Туган ишегаллары» программасы гамәлгә ашырыла
Россиядә Гаилә елы кысаларында Казандагы халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлеге белгечләре «Туган ишегаллары» гаилә-сәламәтләндерү чаралары программасын тормышка ашыра. Программа нигезендә – «Шәхеснең үз-үзен оештыру чарасы буларак ишегалды уеннары» технологиясе, ул балаларның психик һәм физик сәламәтлеген саклауга, тирә-юньдәгеләр белән адекват мөнәсәбәтләр төзүгә, коммуникатив күнекмәләр формалаштыруга юнәлдерелгән.
Әйтик, июнь аенда Казанның Авиатөзелеш районында гаиләгә һәм балаларга социаль ярдәм бүлекчәсендә балигъ булмаганнар һәм аларның социаль хезмәт күрсәтүдәге ата-аналары, шул исәптән сәламәтлек мөмкинлекләре чикләнгән балалар өчен, «Гаилә җәе» спорт-уен программасы узды.
Бүлек белгечләре әйтүенчә, ишегалды уеннары баланың үз-үзен бәяләү дәрәҗәсен күтәрергә, ышаныч һәм аңлау атмосферасын булдырырга мөмкинлек бирә, ә ата-аналарны уртак ял итүгә җәлеп итү гаилә институтын ныгытуга, балалар–ата-аналар мөнәсәбәтләрен, аралашу культурасын үстерүгә ярдәм итә.