«Демография» илкүләм проекты: күчмә чаралар өлкәннәрне сыйфатлы медицина ярдәме белән тәэмин итәргә мөмкинлек бирә
«Демография» милли проектының «Өлкән буын» федераль проектын гамәлгә ашыру кысаларында авыл җирлегендә яшәүче 65 яшьтән өлкәнрәк кешеләрне һәм инвалидларны профилактик медицина тикшерүләрен һәм диспансерлаштыру уздыру максатыннан Теләче районының медицина оешмаларына китерү оештырыла. Чаралар «Чишмә» халыкка социаль хезмәт күрсәтү комплекслы үзәгенең махсус автомобиле белән бушлай башкарыла.
Агымдагы елның беренче кварталында 324 өлкән яшьтәге граждан медицина тикшерүе узган. Хастаханә администрациясе белән берлектә расланган график нигезендә апрель аенда медицина учреждениеләренә 110 кешене китерү планлаштырыла.
Диспансерлаштыруны даими рәвештә узу төрле сәламәтлек проблемалары барлыкка килү куркынычын киметергә ярдәм итә яки авыруның башлангыч стадияләрдә барлыкка килүен ачыкларга мөмкинлек бирә. Шушы көннәрдә 65 яшьтән өлкәнрәк булган өлкән яшьтәге хатын-кызлар белән бушлай маммография узу өчен чаралар яңадан башланды.
«Чишмә» комплекслы үзәге һәм сәламәтлек саклау учреждениесе хезмәткәрләренең җайга салынган гамәлләре нәтиҗәсендә өлкән буын сыйфатлы медицина ярдәме алсын өчен барлык шартлар да тудырылган.