Татарстанда үзенчәлекле балалар өчен «Кояш һәркемдә» талантлар фестивале узачак
Мөмкинлекләре чикле талантлы балаларны ачыклау һәм аларга ярдәм итү, җәмгыятьтә аларга карата уңай мөнәсәбәт формалаштыру, мондый кешеләрдә актив тормыш позициясен формалаштыру өчен «Сандугач» хәйрия фонды «Нур» хатын-кызлар социаль инициативалары ассоциациясе белән берлектә «Кояш һәркемдә» хәйрия фестивален оештыра.
Фестивальнең миссиясе – сәламәтлек мөмкинлекләре чикләнгән балаларның иҗади күнекмәләрен һәм кызыксынуларын үстерүгә ярдәм итү, аларның мәдәни һәм иҗади үсеше өчен шартлар тудыру.
«Кояш һәркемдә» фестивале ике этапта узачак. Сайлап алу этабы онлайн узачак. Гала-концерт Казанда 6 ноябрьдә узачак.
Фестивальдә катнашырга бөтен Татарстан Республикасыннан 6 яшьтән алып 18 яшькә кадәрге балалар чакырыла. Фестиваль турында тулырак сылтама буенча: https://vk.com/sandugach_dobro.