«Изгелек» тернәкләндерү үзәгендә спорт ярышлары узды
Бүген Яр Чаллы шәһәренең «Изгелек» инвалидларны тернәкләндерү үзәгендә мөмкинлекләре чикле кешеләр өчен шашка һәм дартс буенча ярышлар узды. Чарада Татарстанның барлык почмакларыннан үзәкнең тернәкләнүчеләре катнашты.
«Үземә ышанам» проекты кысаларында ярышларны Татарстан Республикасы инвалидларының «Спорт хәрәкәте» региональ иҗтимагый оешмасы һәм «Динамо» ШС үткәрде.
Барлык катнашучылар да «Үземә ышанам» проектының кураторы булган шәһәр советы депутаты Илнур Исмәгыйлевтән истәлекле бүләкләр һәм татлы күчтәнәчләр алдылар. Шулай ук хәйрияче исеменнән турнир җиңүчеләренә һәм призерларына дипломнар, медальләр, призлар, ә «Изгелек» үзәгенә спорт инвентары тапшырылды.
Мондый спорт чаралары социаль хезмәт алучыларга уңай эмоцияләр, бер-берсе белән аралашу шатлыгы бүләк итә, бу тернәкләнү процессына уңай йогынты ясый.