Буа интернат-йорты карамагындагылар җәйге фотосессиядә булдылар

2023 елның 3 августы, пәнҗешәмбе

Буа өлкәннәр һәм инвалидлар өчен интернат-йортында социаль хезмәтләр алучылар кояшлы җәйгә, ә учреждение хезмәткәрләре – үз карамагындагыларга сокланып туймый.

Бүген интернат-йорт белгечләре көнбагыш белән җәйге фотосессия оештырдылар. «Җәй – фотосессия өчен уникаль идеяларны тормышка ашыру өчен иң яхшы вакыт. Кояшлы һәм төсле пейзажлар оригиналь һәм матур фотолар төшерергә мөмкинлек бирә», – диләр интернат-йортта.

Фотолар матур гына түгел, бик эчтәлекле дә булып чыкты. «Әби-бабайларның янып торган күзләрен күргәч, аларның чын мәгънәсендә бәхетле булуларын аңлыйсың», – дип уртаклашты чарадан соң учреждение психологы Светлана Айметова.

Калган фотоларны монда карарга була >>.