Спас интернат-йортында инвалидлар җәмгыяте активисты белән очрашу узды

Спас районы инвалидлар җәмгыяте рәисе урынбасары Рәшит Зиатдинов катнашындагы чара Халыкара инвалидлар хокуклары өчен көрәш көненә багышланган иде.

Спас өлкәннәр һәм инвалидлар өчен интернат-йортында социаль хезмәтләр алучыларга кунакка икенче төркем инвалиды Рәшид Зиатдинов кулдан ясалган өч тәгәрмәчле велосипедта килде. Ул спорт белән шөгыльләнүе һәм актив иҗтимагый эш алып баруы турында сөйләде. Интернат-йорт карамагындагылар кунакны кызыксынып тыңладылар, сораулар бирделәр. Ахырда гармун астында хәрби җырлар башкардылар.

«Сәламәтлек мөмкинлекләренең чикләнүе минем өчен бернинди киртә дә түгел. Тормышны яратыгыз, төшенкелеккә бирелмәгез, үз-үзегезгә ышаныгыз», – дип мөрәҗәгать итте социаль хезмәтләр алучыларга Рәшит Зиатдинов.