ТР Хезмәт министрлыгы: бер эшсез татарстанлыга биш вакансия туры килә
Татарстанның хезмәт базарында 6,9 мең эшсез кеше теркәлгән, шул ук вакытта төбәк эш бирүчеләре 39 мең вакансия тәкъдим итә. Димәк, һәр эшсез кешегә биш эш тәкъдиме туры килә. Бүген ТР хезмәт, халыкны эш белән тәэмин итү һәм социаль яклау министры Эльмира Зарипова «Татар-информ»да узган матбугат конференциясендә шундый мәгълүмат җиткерде.
«Татарстанда, гомумән Россия буенча кебек үк, эшсезлек дәрәҗәсе түбән. Бүген без сорау белән тәкъдим арасындагы каршылыкны һөнәри-квалификация ягыннан да, территориаль ихтыяҗлар ягыннан да күзәтәбез. Кайбер районнарда тәкъдимнәр бар, ләкин тиешле һөнәри квалификациягә ия кешеләр юк. Шул ук вакытта кадрлар булган, ләкин эш урыннары булмаган районнар бар», – диде ул.
Эльмира Зарипова дәүләт ярдәм программалары гамәлгә ашырылуын аңлатты. Алар бу структур эшсезлекне җиңәргә юнәлтелгән. Мәсәлән, бу күченгәндә ярдәм күрсәтү. Шул ук вакытта Татарстанда мәшгульлек дәрәҗәсе югары – 62,4 %, ә Россия буенча ул уртача 60,1 %, ә Идел буе федераль округы буенча – 59,5 %.