«Кайгырту» приютында тәрбияләнүчеләр «Сәламәтлек һәм шатлык территориясе» проекты кысаларында диспансерлаштыру уздылар
Сәламәтлек культурасын формалаштыру, физиологик яшәү сәләтен ныгыту һәм балаларны сәламәт яшәү рәвешенә җәлеп итү максатларында Алексеевскның «Кайгырту» социаль приютында «Сәламәтлек һәм шатлык территориясе» проекты тормышка ашырыла. Ул «Гражданнарның сәламәтлеген саклау, сәламәт яшәү рәвешен пропагандалау» номинациясендә республика гранты алган.
«Сәламәтлек һәм шатлык территориясе» – авыр тормыш хәлендә калган балаларга физик сәламәтлекләрен саклауда ярдәм итәчәк проект. Проектны кертүнең беренче исәп ноктасы булып тәрбияләнүчеләрне БРКХ белгечләре тарафыннан планлы диспансерлаштыру тора. Тикшерү нәтиҗәсендә 3 сәламәтлек төркеме бүленде: 1 төркем – 6 бала, 2 төркем – 19 бала, 3 төркем – 2 бала. Барлык балалар буенча да спорт-сәламәтләндерү эшчәнлегенә җәлеп итү юлы белән физик сәламәтлекне саклап калу өчен тәкъдимнәр бирелде.
Приютта проект балаларга системалы физик күнегүләрне бушлай алырга ярдәм итәчәк дип саныйлар. Проектта катнашып, приютта тәрбияләнүчеләр физик яктан ныгыячаклар, билгеле бер спорт төрләре белән шөгыльләнүләрен дәвам итәчәкләр, аларның мотивациясе артачак. Моннан тыш, тренажер мәйданчыгында дәресләр балалар һәм яшүсмерләрнең буш вакытлары һәм ял итү мәсьәләләрен хәл итәргә ярдәм итәчәк, яшьләрне зарарлы гадәтләрдән читкә юнәлтәчәк.