Татарстанлыларның аерым категорияләре участок эчендә газ үткәрүгә субсидия ала ала

Татарстан Республикасында гражданнарның аерым категорияләренә йорт хуҗалыгы участогы чикләре эчендә газ үткәрүгә һәм йорт эчендәге газ җиһазларын сатып алуга бер тапкыр бирелә торган субсидия бирү каралган.

ТР Министрлар Кабинетының 2023 елның 11 мартындагы 231 номерлы карары нигезендә түбәндәге категория гражданнар субсидия ала ала:

- Бөек Ватан сугышы ветераннары;

- сугыш хәрәкәтләре ветераннары;

- һәлак булган (үлгән) сугыш инвалидлары, Бөек Ватан сугышында катнашучылар, сугыш хәрәкәтләре ветераннары гаиләләре әгъзалары;

- I һәм II төркем инвалидлар;

- инвалид баласы булган гаиләләр;

- 18 яшькә кадәрге өч һәм аннан да күбрәк балалы гаиләләр;

- җан башына уртача кереме 19 мең сумнан артмаган гаиләләр;

- РФ милли гвардиясендә хезмәт итүче хәрбиләр, иреклеләр, махсус хәрби операциясе зонасына командировкага җибәрелгән Эчке эшләр министрлыгы һәм ФСБ хезмәткәрләре арасыннан махсус хәрби операциядә катнашучыларның гаиләләре.

Субсидия 2021 елның 21 апреленнән соң төзелгән җир биләү участогы чикләре эчендә газ үткәрү турында килешү булганда бирелә. Бер йортка субсидия бер тапкыр бирелә.

Субсидия чыгымнар күләмендә бирелә, әмма бер йорт хуҗалыгына 100 мең сумнан артмый. Субсидияләнергә тиешле чыгымнар бәясен исәпләгәндә, җир участогы чикләре эчендә газлаштыру буенча проект һәм төзелеш-монтаж эшләренең бәясе, йорт эчендәге газ җиһазлары (һәр төрнең бер атамасы) һәм газны исәпкә алу приборлары сатып алу исәпкә алына.

Субсидияләнергә тиешле газ үткәрү буенча проект һәм төзелеш-монтаж эшләре исемлеге:

- газлаштыру проектын эшләү;

- җир участогы буенча (җир өстендәге яки җир астындагы ысул белән) газүткәргеч салу;

- эчке газүткәргечләр салу;

- котельная һәм кухня җайлау (газ кулланучы җиһаз урнаштыру, газүткәргеч кертү өчен урыннар әзерләү, төтен чыгару һәм вентиляция каналларын төзекләндерү);

- кайнар су белән тәэмин итү контурын су белән тәэмин итү өчен суүткәргеч кертү һәм кирәк булганда җылыту системасы контурын тутыру өчен җайланма.

Газ исәпләгеч, газ плитәсе, җылылык генераторы, газлылык сигнализаторы кебек йорт эчендәге газ җиһазларын сатып алу субсидияләнә.

Субсидия алу өчен яшәү урыны буенча Республика матди ярдәм (компенсация түләүләре) үзәге бүлегенә гариза бирергә кирәк.