«Асылташ» социаль приютында ата-аналар белән очрашу оештырылды
«Ата-аналар мәктәбе» программасы кысаларында 16 гыйнварда Яр Чаллының «Асылташ» балалар һәм яшүсмерләр өчен социаль приютында ата-аналар һәм учреждение белгечләре җыелышы узды.
Белгечләр «Приютта тәрбияләнүчеләрнең тормышы һәм сәламәтлеге» темасына дәрес үткәрделәр. Җыелышта балигъ булмаганнарны социаль тернәкләндерү мәсьәләләре буенча фикер алыштылар. Ата-аналарга балалар көне режимы, приюттагы туклану үзенчәлекләре, мәктәптә балаларның өлгереше турында сөйләделәр. Катнашучылар актуаль сорауларга җаваплар ала алдылар.
Приют психологы балалар һәм ата-аналар мөнәсәбәтләрен тотрыклыландыруга юнәлдерелгән «Гаилә бәлеше» дигән уртак психологик күнегү үткәрде.
Ата-аналар белән мондый очрашулар балалар һәм ата-аналар мөнәсәбәтләрен ныгытырга һәм ата-аналарның педагогик грамоталылыгын арттырырга ярдәм итә.