Лениногорск районы социаль хезмәткәрләре өлкәннәрне Скандинавия йөрешенә өйрәтәләр

2023 елның 17 феврале, җомга

«Өлкән яшьтәге гражданнар һәм инвалидлар өчен фин йөреше» социаль технологиясен гамәлгә ашыру кысаларында Лениногорск районы «Исток–Башлангыч» комплекслы үзәгенең өйдә социаль хезмәтләр күрсәтү бүлеге белгече укулар үткәргән. Чараның максаты – саф һавада хәрәкәт активлыгы ярдәмендә өлкән яшьтәге гражданнарны һәм инвалидларны социаль-сәламәтләндерү тернәкләндерүе.

Ормышлы авылының социаль хезмәткәре Флюра Мостафина өлкән яшьтәге гражданнарны фин таякларын куллану буенча инструкция белән таныштырды, йөрү техникасы нигезләре буенча күрсәтмә дәрес үткәрде. Аның сүзләре буенча, Скандинавия йөреше – физик сәламәтлекне һәм психоэмоциональ халәтне саклау, тормыш сыйфатын яхшырту өчен искиткеч ысул.