Казанда социаль-интернат учреждениеләре педагоглары өчен мастер-класслар үткәрделәр
Россия Федерациясендә Педагог һәм остаз елы, шулай ук Татарстан Республикасында Милли мәдәниятләр һәм традицияләр елы кысаларында «АК БАРС СОЗИДАНИЕ» Хәйрия фонды социаль-интернат учреждениеләре педагоглары өчен сирәк, юкка чыга торган һөнәрләр буенча мастер-класслар оештырды һәм үткәрде. Чараларда Аксубай районының «Хыял» балалар һәм яшүсмерләр өчен социаль приют тәрбиячеләре Алевтина Павлова һәм Лилия Абдулкина да актив катнаштылар.
«Тузны сәнгати эшкәртү» мастер-классын Пермь краеның халык остасы Валентина Петухова үткәрде. Беларусь Республикасының Халык иҗаты осталары берлеге әгъзасы Ирина Кухтина салам үрү традицияләре турында сөйләде. Осталар үзләренең уникаль эшләрен бик теләп күрсәттеләр. Мастер-классның һәр катнашучысы илһамланып эшне күзәтте, барысы да осталар артыннан кабатларга тырышты.
«Хыял» приюты белгечләре алган белемнәрен балалар белән эшләүдә кулланырга ниятли.