«Изгелек» тернәкләндерү үзәгендә дартс һәм шашка буенча ярышлар узды
Бүген Яр Чаллының «Изгелек» инвалидларны тернәкләндерү үзәге белгечләре «Спорт хәрәкәте» Татарстан Республикасы инвалидларының төбәк иҗтимагый оешмасы рәисе Әсхәт Галиев ярдәме белән шашка һәм дартс буенча ярышлар оештырдылар. Чара сәламәт яшәү рәвешен популярлаштыру максатыннан үткәрелде.
Оештыручылар уенда катнашучыларны сәламләделәр, инструктаж үткәрделәр, уеннар кагыйдәләре турында искәрттеләр. Социаль хезмәт алучылар физик мөмкинлекләре буенча уенның бер төрен сайладылар.
Әсхәт Галиев шәһәр советы депутаты, «Автократ» ҖЧҖ генераль директоры Илнур Исмәгыйлев һәм җаваплылыгы чикләнгән җәмгыять коллективы исеменнән җиңүчеләргә дипломнар, медальләр, истәлекле бүләкләр тапшырды. Барлык катнашучылар да татлы призлар алдылар.
Чарада 50 кеше катнашты.