Алабуга интернат-йорты «Елабуга УкупрПласт» ҖЧҖ белән уңышлы хезмәттәшлек итә
Алабуга өлкәннәр һәм инвалидлар өчен интернат-йортында Халыкара ак кул таягы көне кысаларында чаралар уза. Әйтик, тематик айлык кысаларында учреждениедә «Бер-береңә каршы» очрашу кичәсе узды. Чара «Елабуга УкупрПласт» ҖЧҖ клубының иҗат коллективы белән берлектә уздырылды.
«Аккорд» вокаль ансамбле концерт программасын тәкъдим итте, анда рус һәм татар телләрендә Ватан, мәхәббәт, дуслык турында шигырьләр һәм җырлар яңгырады. Коллективта катнашучыларның берсе Владимир Фомин хәзер интернат-йортта яши, ул күрү буенча беренче төркем инвалид һәм предприятие клубында бик теләп шөгыльләнә. Бу кичәдә ул тамашачылар өчен «Ухарь-купец» җырын башкарды.
Кич буе залда җылы атмосфера хөкем сөрде, алкышлар яңгырады. Тамашачылар кунакларны бик җылы кабул иттеләр.
Интернат-йорт белән предприятиенең хезмәттәшлеге иҗади чаралар белән генә чикләнми. Индивидуаль тернәкләндерү һәм абилитация программалары нигезендә берничә социаль хезмәт алучы «Елабуга УкупрПласт» ҖЧҖдә эшкә урнаштырылган. Алар өйдә эшлиләр – массаж щеткалары өчен алюминий энәләр белән резин нигез җыялар. Кемгәдер профессиональ терапия кабинетында шөгыльләнү уңайлы, кемдер бүлмәдә эшли. Эш материалларын предприятие хезмәткәрләре айга ике тапкыр алып килә. Шул ук көннәрдә алар әзер продукцияне кабул итәләр.