«Шәфкать»тә Халыкара светофор көнен билгеләп үттеләр

Кукмараның «Шәфкать» мөмкинлекләре чикле балалар һәм яшүсмерләр өчен тернәкләндерү үзәгендә Халыкара светофор көне кысаларында «Безнең дустыбыз – светофор» дип исемләнгән иҗади дәрес уздырылган.

Дәреснең максаты – тәрбияләнүчеләрне рәсем ясарга өйрәтү, күреп һәм ишетеп кабул итү сәләтен үстерү.

Дәрес барышында тәрбияләнүчеләр урамда көтеп торган куркынычлар турында фикер алыштылар, дөрес эзлеклелектә – кызыл, сары, яшел төсләрдән түгәрәкләрне ябыштырырга өйрәнделәр. Дәрес ахырында балаларга «Кызыл – яшел» һәм «Светофор» дидактик уеннары тәкъдим ителде.

Дәрес бик эчтәлекле узды, балалар үзләре өчен бик күп мөһим мәгълүмат белделәр һәм үзләрен кызыксындырган сорауларга җаваплар алдылар.