«Астра» тернәкләндерү үзәгендә экологик агарту чарасы үткәрелде
«Түбән Кама» милли паркы хезмәткәре Юлия Лукьянова Алабуга районының «Астра» мөмкинлекләре чикле балалар һәм яшүсмерләр өчен тернәкләндерү үзәгендә тәрбияләнүчеләр өчен экологик агарту чарасы үткәрде. Балаларга кыр шартларында фототозаклар белән эшләү турында сөйләделәр. Аларны башкача урман камералары дип атыйлар.
«Россиянең барлык тыюлыклары һәм милли парклары диярлек хайваннар дөньясын, аерым төрләрнең экологиясен тикшерү, экологик агарту проектларын әзерләү өчен фототозакларны уңышлы кулланалар», – диде Юлия Лукьянова. Ул әлеге җайланмалар турында җентекләп сөйләде, балаларны һәм аларның ата-аналарын «Түбән Кама» милли паркы буенча фотокүргәзмә белән таныштырды. Әңгәмә барышында милли парктагы җәнлекләр һәм кошлар тормышыннан уникаль фотолар тәкъдим ителде, табигый мохиттә хайваннарның үз-үзләрен тотышын теркәгән видеороликлар күрсәтелде.
Балалар милли парктан «Түбән Кама» альманахының чираттагы чыгарылышын, открыткалар-агиткалар, QR-кодлы календарьларны алдылар. Кодлар сканеры ярдәмендә балалар милли паркның җырчы кошларының тавышын ишетә алачак.