«Астра» үзәгендә балаларга экологик тәрбия бирү белән шөгыльләнәләр
Шушы көннәрдә Алабуга муниципаль районындагы «Астра» мөмкинлекләре чикле балалар һәм яшүсмерләр өчен тернәкләндерү үзәгендә тәүлек буе эшли торган стационар тәрбиячеләре Кашапова Лилия һәм Белова Наталья экология турында танып-белү викторинасы үткәрделәр. Чараның бурычлары: балаларда экологик культура һәм табигатькә дөрес караш формалаштыру.
Викторина «Экологик ребуслар», «Кызыл китап турында нәрсә беләбез», «Табигать билгеләре» дигән берничә турдан торды. Балалар табигатьтә үз-үзеңне тоту кагыйдәләрен искә төшерделәр, табышмаклар чиштеләр, рәсем ясадылар, педагогларның сорауларына җавап бирделәр, дидактик уеннарда актив катнаштылар.
Тәрбиячеләрнең сүзләренә караганда, мондый чаралар тернәкләнүчеләрнең уңай кәефенә генә түгел, ә әйләнә-тирә мохиткә сакчыл караш тәрбияли.