Түбән Кама яшүсмерләренә гадәттән тыш хәлләрдә нишләргә кирәклеген искәрттеләр
Терроризм һәм экстремизмны профилактикалау кысаларында 10 февраль көнне Түбән Каманың «Веста» гаиләгә һәм балаларга социаль ярдәм күрсәтү үзәгенең социаль эш буенча белгече Марта Камалова «Мин иминлектә» программасыннан «Заложник психологиясе» дигән видеофильм карау һәм фикер алышу белән кинотренинг үткәрде. 19 балигъ булмаган бала катнашында дәрес 7 нче социаль участогында узды.
Дәрес башында белгеч катнашучыларны «терроризм» һәм «экстремизм» төшенчәләре белән таныштырды, гадәттән тыш хәлләрдә үз-үзеңне тоту кагыйдәләре турында бергәләп фикер алыштылар. Белгеч билгеләп үткәнчә, иң мөһиме – сәламәт акылда һәм тынычлыкта калу: «Башкалар турында кайгыртучыларга тынычлыкны саклап калу җиңелрәк. Шартлар мөмкинлек бирсә, үз-үзеңә йомылмаска, башка кешеләргә карап, кемгә дә булса ярдәм кирәк түгеллеген ачыкларга кирәк». Балалар дәрестә тагын бер әйбер аңладылар – вакыйга урыныннан бары хөҗүм вакытында гына качып китү мөмкинлеге бар. Әгәр дә террористлар инде басып алса, качуга бернинди омтылыш та кабул итәргә кирәкми, чөнки бу хәлне катлауландыра гына ала.
Алган белемнәрне ныгыту өчен мәгълүмат «Заложник психологиясе» дигән видеофильм карау белән үрелеп барды, ә очрашу ахырында белгеч катнашучыларга мәгълүмати белешмәлекләр таратты.