«Гармония» үзәге белгече балигъ булмаганнар белән тренинг үткәрде
Буаның «Гармония» халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлекчәсе психологы Альбина Сәгъдиева балигъ булмаганнар арасында хокук бозуларны кисәтүгә юнәлдерелгән тренинг үткәрде.
Чараның төп максаты – баланың үз-үзен бәяләвен арттыру. Белгеч фикеренчә, еш кына нәкъ менә түбән бәя балигъ булмаганнарны хокукка каршы билгеле бер гамәлләргә этәрә. Тренингның бурычлары: үз-үзеңне дөрес бәяләү күнекмәләрен формалаштыру, үз-үзеңне тикшерү һәм дөрес карарлар кабул итү өчен эмоциональ халәтне бәяләү, балаларны танып-белү эшчәнлегенә җәлеп итү.
Балигъ булмаган социаль хезмәтләр алучыларга «Үз-үземне хөрмәт итү» күнегүе тәкъдим ителде. Балалар белән закон алдында җаваплылык, җәза төрләре турында әңгәмә кордылар. Тренинг ахырында рефлексия үткәрделәр: балалар үзләре турында үз фикерләрен әйттеләр, үзләрендә күбрәк уңай сыйфатлар булдырырга кирәк дигән нәтиҗәгә килделәр.