ТР Балтач районында яшәүче Зыятдиновлар гаиләсе Идел Буе федераль округының иң уңышлы гаиләсе дип танылды

2013 елның 3 июне, дүшәмбе
31 май-1 июнь көннәрендә Пенза шәһәрендә “Идел Буеның уңышлы гаиләсе-2013” дип исемләнгән беренче округ фестиваль-конкурсы булып узды. Бүләкләү тантанасына округ төбәкләрендә иң уңышлы дип табылган гаиләләр, гаилә, ана булу, балачак, социаль ятимлек, ятим һәм караучысыз калган балаларны яклау мәсьәләләре буенча Округ советында катнашучылар җыелган иде. Бу көнне иң уңышлы гаиләләрне җиңүләре белән тәбрикләргә Идел Буе федераль округында РФ Президентының вәкаләтле вәкиле Михаил Бабич килде. Ул, конкурста катнашкан һәркемне, аеруча финалистларны кайнар котлап, аларга киләчәктә уңышлар теләде. Аның сүзләре бу бәйгедә җиңү яулаган һәр гаиләне канатландырырлык иде. “Идел Буе федераль округында гаилә институтын ныгыту - иң мөһим мәсьәләләрнең берсе. РФ Президентының еллык юлламасында әйтелгәнчә, гаиләле булу модага керсен иде. Балалар   - гаиләнең иң мөһим кыйммәте”, - диде ул.
Фестивальнең дәрәҗәле кунаклары арасында танылган җырчы, композитор, пианист Дмитрий Маликов та бар иде. Шулай ук тамашачылар алдында төрле төбәкләрдән килгән иҗат төркемнәре дә чыгыш ясады.
Идел буе округының 14 төбәгеннән килгән вәкилләр чыгыш ясаган әлеге бәйгедә Татарстан данын Балтач районының Карадуган авылында яшәүче Зыятдиновлар гаиләсе яклады. Аларның чыгышы әзерлек, сәхнә куелышы, иҗади номерларының эчтәлеге, стендлар, күргәзмә материаллар ягыннан да иң югары бәягә генә лаек иде. Моңа конкурста катнашкан һәркем, шул исәптән мәртәбәле жюри әһелләре дә үз күзләре белән күреп, инандылар. Нәтиҗәдә, Зыятдиновлар гаиләсе “Идел Буеның уңышлы гаиләсе-2013” конкурсында абсолют җиңүче исеменә лаек дип табылды.
Татарстанны әлеге конкурста яхшы яктан күрсәткән гаиләләр рәтендә Аксубай районыннан Максимовлар гаиләсе бар иде. Алар, ятим һәм караучысыз калган балаларны тәрбияләүче гаилә буларак “Мәрхәмәтле йөрәк” номинациясендә дипломант булуга ирештеләр.
Татарстан Республикасы исеменнән катнашкан барлык гаиләләр дә үрнәк балалар тәрбияләүдә генә түгел, ә бәлки иҗтимагый тормышта да хәйран гына уңышка ирешкәннәр. Мәсәлән, күп бала анасы Фирая Зыятдинова даими рәвештә күп кенә федераль һәм республикакүләм конкурсларда катнашып килә. Узган елгы “Нечкәбил” конкурсында финалга чыккан. «Уңган Нечкәбил» һәм «Иң Нечкәбил» номинацияләре дипломанты. Фирая Муллазиевна Карадуган авылында эшләп килүче “Ясмин” ветераннар ансамбленең алыштыргысыз җитәкчесе һәи нигез салучысы. Хәйрия чаралары да аннан башка үтми. Әле җирле радио һәм “Сөембикә” журналы аша яшь әниләргә, хуҗабикәләргә дә киңәшләрен бирә, докладлар белән матбугатта чыгыш ясый. Ул – балалары өчен үрнәк әни, яхшы хатын, уңган килен.
Гаилә башлыгы Булат Бакый улы Зыятдинов төзегән әлеге нык гаиләгә 14 яшь. Ул үз гаиләсен генә түгел, “Игенче” авыл хуҗалыгы  җәмгыятен дә җитәкләргә көч һәм вакыт таба.   2003 нче елдан бирле инде күмәк хуҗалык рәисе булып эшләп, районда күп кенә дәрәҗәләргә ирешкән шәхес ул. Аңа карата үрнәк гаилә башлыгы, 4 малай, 1 кызның яхшы, кайгыртучан әтисе буларак кына түгел, булдыклы һәм мәрхәмәле җитәкче буларак та ихтирам зурдан.
Барлык Зыятдиновлар  да спорт белән дус, актив һәм сәламәт тормыш рәвеше алып баралар. Олы уллары Самат, Вахит һәм Газиз район һәм мәктәпнең спорт түгәрәкләренә йөриләр, ярышларда призлы урыннарны бирмиләр.
Билгеләп үтик, “Идел Буеның уңышлы гаиләсе-2013” конкурсының максатлары гаилә имиджын күтәрү, гаилә кыйммәтләрен һәм гореф-гадәтләрен  пропагандалаудан гыйбарәт. Бу конкурс гаилә тәрбиясе традицияләрен алга җибәрүче, күмәк иҗат һәм ялны үстерүче гаиләләрне барлау, аларны үрнәк итеп күрсәтү, Идел буе округында гаилә сәясәтен алып баручы дәүләт ара структуралар, иҗтимагый хәрәкәтләр һәм оешмалар арасында тәҗрибә алмашу кебек бурычларны үтәүне күздә тотып үткәрелә.
 
 
 
 
 
 
 
 
Министрлыкның матбугат хезмәте үзәге
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Министрлык
Документлар
Матбугат хезмәте
Гражданнарның мөрәҗәгатьләре
Адрес: 420044, Казан шәһәре, Волгоград урамы, 47
Телефон: кайнар элемтә: 8-800-100-00-01, 557-21-12 (Халык белән эшләү секторы)
Факс: +7 (843) 523-90-74
E-Mail: mtsz@tatar.ru
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International