Татарстан Республикасы Хезмәт, халыкны эш белән тәэмин итү һәм социаль яклау министрлыгы

Күп акча алырга теләсәң - эшләргә өйрән

2013 елның 29 мае, чәршәмбе

Яшь белгечләрнең күбесе эш урыннарында хезмәт хакларының аз булуыннан зарлана. Ә эш бирүчеләр исә яшь белгечләрнең һөнәри әзерлекләре түбән булуын ассызыклый. Бу яшьләрнең таләбе аларның мөмкинлекләренә туры килми дигән сүз. Әлеге мәсьәлә республикабызда иң актуаль проблемаларның берсе булып кала бирә. Аны чишү өчен вакыт һәм бик зур тырышлык кирәк. Моның шулай булуын Татарстан Хезмәт, эш белән тәэмин итү һәм социаль яклау министрлыгының чираттагы коллегия утырышында министр Айрат Шәфигуллин да билгеләп узды. Чара республиканың хезмәт базарын көйләүдә мәшгульлек үзәкләренең тоткан ролен ачыклауга багышланды.

«Яшьләр үзләренең беренче эш урыныннан ук зур акчалар өмет итә. Ә чынлыкта исә аларның мөмкинлекләре эш бирүчеләр куйган таләпләргә җавап бирми», - дип белдерде министр үзенең чыгышында. Аның сүзләренә караганда, әлеге проблеманы чишү өчен, беренче чиратта, яшьләр белән эшләү кирәк. Алар һөнәри яктан гына камилләшеп калмыйча, белемнең үз киләчәкләре өчен ни дәрәҗәдә мөһим булуын аңларга тиеш.

Эшсезләр саны әкренләп кими

Татарстандагы эшсезлек дәрәҗәсенә килгәндә, 22 майга республиканың мәшгульлек үзәкләрендә барлыгы 22 меңнән артык кеше хисапта торган. 2013 елның беренче кварталында аларның саны бераз арткан булса, хәзер исә, киресенчә, эш таба алмаучылар саны кимүгә таба бара, ди. Эшсезлек иң түбән булган төбәкләр рәтендә Лаеш, Питрәч, Актаныш, Апас районнары. Бу күрсәткеч иң югары булган шәһәр исә - Кама Аланы.

Әлеге мәгълүматларны чарада катнашучылар игътибарына хезмәт, эш белән тәэмин итү һәм социаль яклау министры урынбасары Клара Таҗетдинова җиткерде. Ул инвалидларны эшкә урнаштыру белән бәйле проблемаларга аеруча басым ясады.

Бүген республикада 292 мең инвалид исәпләнә, аларның 77 меңе эшкә яраклы кешеләр. Хәзерге вакытта шуларның 63 меңе эшли. 2012 елда инвалид өчен бер эш урыны булдыруга 50 мең сум бүлеп бирелгән булса, быел исә бу сумма 66,2 мең сум тәшкил итә. Шунысы кызганыч, мәшгульлек үзәкләрендә хисапта торучы инвалидларның бары тик 55 проценты гына эшләргә тели. Калганнары исә эшсезлек буенча пособие алу өчен генә килә икән.

Коллегиядә катнашучылар инвалидларның һәрберсе белән индивидуаль рәвештә эшләргә кирәк дигән уртак нәтиҗәгә килде. Мөмкинлекләре чикле ватандашларның эш сорап килүен көтеп утыру да дөрес түгел. Аларның үзләрен эзләп табарга һәм һәрберсенә яраклы эш тәкъдим итәргә тырышырга кирәк.

"Интертат.ру" электрон газетасы материаллары буенча

БАРЛЫК ЯҢАЛЫКЛАРНЫ УКУ