Яшь казанлыларга юлларда куркынычсызлык кагыйдәләре турында искәрттеләр
22 нче июль көнне Казанның Вахитов районы гаиләгә һәм балаларга социаль ярдәм бүлеге белгечләре профилактик эш кысаларында төркемле дәрес оештырдылар. Социаль хезмәт алучы гаиләләрдән булган балигъ булмаган балалар катнашында чара ЮХИДИ инспекторлары белән берлектә үткәрелде.
Дәреснең максаты – юл йөрү кагыйдәләре буенча белемне ныгыту һәм юлда куркынычсыз үз-үзеңне тоту нигезләрен пропагандалау.
Өстәл уеннары барышында балалар белән төрле юл ситуацияләре уйналды. Шулай ук балигъ булмаганнар мультипликацион фильм карадылар, ул юл билгеләре һәм тамгалары теле белән таныштырды, юл аша чыгу һәм җәмәгать транспортыннан файдалану кагыйдәләренә өйрәтте.
Чара ахырында балалар бүләккә яктылыкны чагылдыручы элементлар белән беләзекләр һәм «Балачакның хәерле юлы» гәҗите алдылар.