Тернәкләндерү хезмәтләре алучылар белән эшләүдә кинезиотерапия

2021 елның 25 июне, җомга

Алабуганың «Астра» мөмкинлекләре чикле балалар һәм яшүсмерләр өчен тернәкләндерү үзәгендә кинезиотерапия ысулы уңышлы кулланыла. Ул билгеле бер хәрәкәт күнегүләре аша акыл сәләтен һәм физик сәламәтлекне үстерүне күздә тота.

Дәресләрне укытучы-дефектолог Ольга Анкудинова һәм педагог-психолог Анна Ахунова үткәрә. Оригиналь күнегүләр һәм уеннар системасы балаларның физик һәм психик сыйфатын үстерергә, аларның үсешендә тайпылышларны кисәтергә ярдәм итә. Нәтиҗәдә, балаларда эмоциональ иминлек дәрәҗәсе күтәрелә, күрү-мотор координациясе яхшыра, киңлектә ориентлаша белү осталыгы формалаша.