Ел башыннан Менделеевскида 569 өлкән кешене йөреп чыкканнар
«Демография» илкүләм проектының «Өлкән буын» федераль проектын гамәлгә ашыру кысаларында Менделеевск муниципаль районында 70 яшьтән өлкәнрәк ялгыз һәм ялгыз яшәүче гражданнарны өйләренә барып карау дәвам итә. Чараларның максаты – яшь һәм (яки) сәламәтлеге торышы аркасында төп тормыш ихтыяҗларын мөстәкыйль рәвештә тәэмин итә алмый торган өлкән яшьтәге гражданнарны ачыклау.
Гражданнарга чыгу вакытында «Өмет яры» халыкка социаль хезмәт күрсәтү комплекслы үзәге белгечләре хезмәт таныклыгын, тиешле боерык күчермәсен күрсәтәләр, өлкән яшьтәге кешеләргә өйдә социаль хезмәт күрсәтү бүлегендә социаль хезмәтләр алу мөмкинлеге, хезмәтләр исемлеге, социаль хезмәт күрсәтү шартлары, өлкән яшьтәге гражданнарга социаль ярдәм чаралары турында хәбәр итәләр. Шулай ук янгын-профилактик эш алып барыла, автоном янгын хәбәрчеләре тикшерелә, көнкүреш электр приборларын, газ җиһазларын, мичләрне, электр җиһазларын куркынычсыз эксплуатацияләү буенча инструктаж үткәрелә. Тикшерү кысаларында татарстанлыларга «Янгын куркынычсызлыгы», «Стоп! Мошенниклар!» һәм «Террорчылыкка каршы куркынычсызлык» дигән белешмәлекләр тапшырыла.
2021 елның 16 июненә Менделеевск районында әлеге чаралар белән 569 кеше колачланган, шуларның 8, өйгә барып хезмәт күрсәтү өчен, «Өмет яры» үзәгенә кабул ителгән.