«Шәфкать» үзәге тернәкләнүчеләре Махсус Олимпиада программалары буенча шөгыльләнәләр
Махсус Олимпиаданың «FIT 5 – яхшы физик форма» дигән программасын тормышка ашыру кысаларында Кукмара районы «Шәфкать» мөмкинлекләре чикле балалар һәм яшүсмерләр өчен тернәкләндерү үзәгендә спорт-күңел ачу чарасы узды. Анда тернәкләндерү курсы узучы балалар катнашты.
Дәрестә төрле спорт җиһазлары кулланылды: гантельләр, эспандерлар, туплар һ.б. Балалар төрле күнегүләрне бик теләп башкардылар. Дәрес ахырында тренер аларга бу күнегүләрне өйдә дә, ата-аналары белән бергә башкарырга киңәш итте.
Чараның максаты – балаларны физик культура белән шөгыльләнүгә җәлеп итү һәм сәламәт яшәү рәвешен пропагандалау. Тәкъдим ителгән биремнәрне үтәү нәтиҗәсендә балаларның скелет-мускул һәм сөяк системалары ныгый, буын һәм мускуллар авыруларының куркынычы кими – болар барысы да гомуми физик әзерлектә, тышкы кыяфәттә һәм баланың активлыгы дәрәҗәсендә уңай чагылыш таба.