Казанда ата-аналарны тормыш рәвешендә хәвеф факторлары белән таныштырдылар
26 нчы май көнне 89 нчы мәктәпнең консультатив пункты базасында Казанның Яңа Савин районындагы гаиләгә һәм балаларга социаль ярдәм бүлекчәсе психологы «Балачак – иминлек территориясе» дип исемләнгән мәгълүмат сәгате үткәрде. Чарада 6-7 сыйныф укучыларының, шул исәптән социаль хезмәт алучыларның әти-әниләре катнашты.
Дәрес ата-аналарга психологик ярдәм күрсәтү, паник кәефләрне кисәтүгә юнәлдерелгән иде. Мәгълүмат сәгате кысаларында психолог ата-аналарны гаиләнең тормыш рәвешендәге хәвеф факторлары белән таныштырды, алар баланың үз-үзен тотышы бозылуының сәбәбе булырга мөмкин: тәрбия стиле, гаиләдә көч куллану, ата-аналар контроленең булмавы яки артык булуы, аралашуның кимүе, гаилә эчендәге мөнәсәбәтләр проблемалары. Җәйге каникуллар алдыннан әти-әниләргә көнкүрештә, җәмәгать урыннарында, юлларда һәм су объектларында балаларның иминлеге өчен җаваплылык турында тагын бер кат искә төшерделәр.
Ахырда психолог ата-аналарның сорауларына җавап бирде, гаиләгә һәм балаларга социаль ярдәм күрсәтү бүлегенең социаль хезмәт күрсәтү тәртибе һәм шартлары турында искә төшерде.