«Асылташ» социаль приютында бакчачылык сезоны башланды

2021 елның 23 апреле, җомга

Яр Чаллының «Асылташ» балалар һәм яшүсмерләр өчен социаль приютында «Яшь бакчачы» остаханәсе үз эшен башлап җибәрде.

20 апрельдән приютта тәрбияләнүчеләр язгы чәчүгә әзерләнә башладылар. Балалар теплицаны тәртипкә китерделәр һәм үсентеләрне: помидор, баклажан, борыч һ.б. тикшерделәр.

Кече яшьтәге балалар карбыз һәм кавынны контейнерларга утырттылар. Шытымнар чыкканнан соң балалар аларны теплицада үстерәчәк.

Учреждение хезмәткәрләре приют территориясендә урнашкан чәчәк түтәлләрен төзекләндерү буенча эш башкардылар, анда тәрбияләнүчеләр төрле төр чәчәкләр: петуния, бархатцы, яран, примула, роза, астра, флокслар һәм күпьеллык хостлар үстерәләр.